Iber d BSG

D BSG, die zwaiteltischti Bängglergsellschaft vo dr Basler Fasnacht, isch allewyyl am Mändig und Mittwuchoobe in de Gaschthyyser vo dr Innestadt underwäggs.

Grindig

D Verdrätter vo acht Schnitzelbängg hän am 18. Jänner 1921 im Glaibasler Wiirtshuus „Rääbhuus“ die „Freie Schnitzelbängg“ grindet. Zämmegfunde hän sich d Bängg: „d Metzger“, „ Alt Fidelio“, „Alt Terrir“, „Zainefligger“, „Alt Gundelfinge“, d Lumpesammler“, „d Stiifelwiggser“ und „d Ratte fänger“. Zem erschte Bresidänt hän si dr Robert Russeberger gwäält.

In eme Grindigsfond hän die acht Bängg je finf Frangge yyzaalt. Dodermit ischs Startkapital vo de Freie Schnitzelbangg 40 Frangge gsi. Als erschti Amtshandlig het me e Schryybe an dr Wirteverband uffgsetzt, daas zem Zyyl gha hett, d Bezaalig vo de Bängg an dr Fasnacht z reegle. Jeede Wirt sell 5 Frangge fir aimooligs Singe zaale. D Fasnacht 1921 (14. bis 16. Hornig) isch dermit die erscht Fasnacht als Verainigung „Freie Schnitzelbängg“ gsi.

Routeblaan

Vor jeedere Fasnacht wird e Routeblaan erstellt. Dert wird feschtghalte, welle Bangg wenn und wo singe duet. In de Joore vo 1970 bis hite hetts grossi Umstellige bi de bsuechte Restaurants, Hotels und Cliquekäller gää. Friener hetts no vyyli Quartierbaize uff em Brogramm gha. Hit so guet wie kaini mee. 1970 bsuecht BSG no 32 Stazioone im Glaibasel und 28 im Grossbasel. 1982 grad no insgesammt 25 verschiideni Lokal oder Cliquekäller. Woobi dr Transfer vo Phunggt 25 (Hotel International in dr Stainevorstadt) zue Phunggt 1 (Restaurant Rääbhuus) jewyyls per Taxi gmacht worde isch.
2004 sins 31 Stazioone, woobi im Theater Fauteuil drei und im Radisson (ehem. International) zwai Sääl bedient worde sin.

Chronik

1921 Grindigsjoor vo de „Freie Schnitzelbängg“
1935 Dr Bundesroot muess sich mit eme hitlerkritische Väärs vo de Freie Schnitzelbängg befasse
1936 Die Freie Schnitzelbängg ändere dr Name in Basler Schnitzelbangg Gsellschaft
1937 D BSG bekunnt neii Statute und e nei Signet
1946 Zaale zer BSG-Fasnacht: 20 Bängg, 114 Baize
1951 Reduktion uff «numme» no 100-105 Baize
1952 D BSG bekunnt e nei Signet
1953 Statuteänderig: maximaal ai Frau wird pro Bangg zuegloo
1956 D Erika Wirz ziet als eerschti Frau mit eme BSG-Bangg duur d Baize (Schnäderänte, zämme mit irem Maa Hansjörg)
1987 S eerschtmool geen 21 Bängg uff d Gass
1994 Diefphunggt in dr BSG-Gschicht: 10 Bängg verleen d BSG
1995 Dr Gryysevorstand mit em Heinrich Klauser bringt wider Rue in d BSG; 13 Bängg mache Fasnacht und d Uffbauarbed foot aa.
2002 Dr dradizionell Schlussoobe vo dr BSG findet s eerschtmool uff de drei Schiff statt
2003 S eerschtmool isch e Frau, Trix Schmid, Bresidäntin vo dr BSG
2006 „Dr Schorsch vom Haafebeggi 2“ lauft sy letschti offizielli Fasnacht no 55 Joor
2008 D BSG goot wiider an Land und bresentiert dr Schlussooben uff dr Biini vo de Theater Fauteuil / Tabourettli und vom Kaisersaal. S laufe numme grad 12 Bängg. E wytere Generatioonewäggsel.
2009 Es sinn 14 Bängg wo laufe, 2 pausiere
2010 Es laufe 13 Bängg, 2 pausiere. D BSG hett zem 90 Joor e modäärn nei Blakaat bikoo.