Bebbi-Buebe

2017


Huanho – Niining – Bingaau
Clian chua gue – xin jen chaau
Die Woort selle e Waarnig syy
Fir jeedi China Dynaschti
D Kyneese sii das macht uns muff
Kaufe schwyzer Fiirme uff
Drumm stoot do druff ganz elegant
D Fasnacht blybt in Basler Hand

Mir sueche voorne – sueche hinde
Laider dien mir do nid finde
Im Handy duet au nid erschyyne
Mir drey sinn muff – es isch zem gryyne
Mir finde si nid – mir sinn fruschtriert
E Boschtstell wo no exischtiert

An dr EM hebt my Schatz mir d Hand
Loos digge – mach mir jo kei Schand
Kasch fiidleblutt duur d Freye springge
Kasch uff dr Fääri Liedli singge
Kasch dr Noochbere ins Fuudi bisse
Aber loss dr s Lyybli nie verrisse

Mi Hund muess ab und zue uff d Gass
Sit neyschtem macht ihm das au Spass
Nur hett äär noonig ganz begriffe
Das äär nid sott uff s Drottwaar schiffe
I saag iim zää mool jeemer nai
Mach dääre Gritte nid ans Bai

Vom FCZ hänn mir vernoo
Äär mecht ganz gäärn an d Fasnacht koo
Bedängge hett s ganz grossi gää
Wuurde die uns z Basel nää
Kemmed nur iir miend begryffe
In Basel sinn iir numme Pfyffe

Die bescht Armee uff dääre Wält
Koschtet uns e huffe Gäld
Vom Parmelin hänn mir erfaare,
Bim Sprängstoff mecht är richtig schpaare
Ganz ginschtig hett är ain uffdriibe
Samsung Galaxy Note siibe

Coop und Migros dien sich wandle
Mit Goldminze dien si handle
Fir beidi liggt e huffe dinn
Uff Ändi Joor e fette Gwinn
Als Biezer muesch das leider schlugge
Finf Rappe koschtet jetzt e Gugge

Mir sinn im Zug uff Ziiri ghoggt
Do hett dr Kondiggteer uns schoggt
Dr Swiss Pass zeige schreyt dä hässig
Das isch normal das isch nid gspässig
Jetzt wisse mir s isch nid verkeert
Das Ziiri halt zem Ussland gheert

D Basler Schugger juubiliere
Si dien zweihundert Jeerle fyyre
Ou jetzt weiss i grad nimm wyter
Äxgysi si s isch nid so schlimm
Mi Coppin weiss dr Täggscht halt nimm
Är hett kei Lugge, vom z viel feschte
Dä duet do nur dr Blackout teschte

Wenn ych die Sach so rächt betracht
Und dra studier bi Daag und Nacht
Wenn i iiberlegg so hii und häär
Und dängg wie s wäär – wenn s anderscht wäär
No wuurd – mir dien eych s do verzelle
E Handschlag au no ebbis zelle

FDP, CVP – LDP und SVP
BDP, GLP jeemer nei was sellsch do nee
Miir liide amme vor de Waale
Immer riisegrossi Quaale
die bescht Gruppierig das muesch gsee
isch halt eifach d BSG

Um d Fasnacht do stoots ganz ganz schytter
S Glyggestäärbe das goot wyter
S fäält iiberal an Material
Die Entwigglig isch fatal
Wotsch Note kaufe bisch verschosse
Dr Musig Hug blybt laider gschlosse

S Vreni die kunnt z spoot in d Schuel
Lyyslig hoggt si uff e Stuel
Zää Pokemoons die han i gfangge
Drum isch s e weeni lengger gangge
Dr Lehrer jo dä toobt vor Wuet
Well s Vreni viel mee finde dueet

Die bescht Armee uff dääre Wält
Koschtet uns e huffe Gäld
Flieger Flab und EDV
E Pischte Radar bruuchtis au
Und ney, s gits niene uff dr Wält
E Schwyzer Duurnschue fir ins Fäld

2016

D’ Bebbi-Buebe hänn phausiert.

2015

Dr Bebbi Sagg gheert uff e Boode
Nai – in d Mulde, das isch Moode
Es wird im Groossroot diskutiert
Wo me dä Sagg denn jetzt blatziert
Mir hätte e Leesig, wo sicher wuurd glingge
Määrggli druff – und Boscht sells fuurt bringe

Die neyi Linie di nach Weil
Die finde mir so richtig geil
Uff Holzsitz im e Flexity
Faarsch am Zellner grad verbyy
S Beschte kunnt grad nach dr Brugg
D Wändeschlaufe wieder zrugg

Mir drei hänn dräumt, s isch richtig gspunne
D Schwyz hett d Fuessball WM gwunne
D Fäns dien juuble, goorbse , schreie
S het Lyt vom Seibi bis an d Freye
Jetzt wach i uff, e Draum wird woor
Nei digge nei
Die steen jo vor em Apple Store

Hinter Haag und Abspeergitter
Seesch si stoo im Blitzliechtgwitter
Eedli Dame, Männer mit Huet
Die finde sich no sälber guet
Mir meine nid die vo dr OSZE
Mir schwäzze vom Faasnachtskomytee

Kiirzlig, si, das het mi beriert
Wird e Schiidsrichter diräggt vom Fuessballblatz gfiert
Dä schreit ummenand, doch alles nuzzt nyd
Es fiere iin ab zää Sicherheitslyt
Mir hänn eine gfroggt, was isch do basiert
Do seit dä Schpreier uff em Blatz, das wird nid tolleriert

Kasch singge, ooni z iiberdriibe
Kasch derzue no Väärsli schriibe
Kasch Helge drille und emmänd
Schpiilsch du au no e Inschtrumänt
Denn bisch du s neggscht Joor jupeidi
Als Quotefrau bi uns derbii

Mir mien eich das jetzt do grad saage
Das Ässe schloot uns uff e Maage
Bulee wo uss Ungarn kunnt
Rind vom Ross und Salami vom Hund
Mir gänn mir eich drumm e ghaime Root
S Bescht isch s Basler Maagebrot

Dr Auderset het kiirzlig znacht
E Tescht mit ere Sexbox gmacht
Är heert deert inn zwei luthals steene
Und stellt sich vor, wie die sich verweene
Derno luegt är ganz diskret duur d Fuege
Und gseet : Die dien e Tennismatsch luege

Kasch singge ooni z iiberdriibe
Kasch derzue no Väärsli schriibe
Kasch Helge drille, und emmänd
Spiilsch du au no e Inschtrumänt
Denn bisch du s neggscht Joor, jupeidi
Als Quotefrau bi uns derbii

Mir Buebe mir sinn ganz arm dra
Mir sotte viel mee Saggäld ha
Es koschtet s Redbull, s Kino, s Händy
Glaider und mi Frindin, d Sändi
S diirschte isch, s isch gaar nid glatt
Dr Rollerparkblatz in dr Stadt

D Basler Fasnacht, s scheenscht uff Äärde
Sell Kulturguet Wältwyyt wäärde
D UNESCO git dä Vorschlaag i
Dr Böög isch leider nid derbii
Und vor Nyyd, jä das isch guet
Blatze d Ziircher fascht vor Wuet

Mir hänn vo uns e Fotti gmacht
Es zeigt uns drei in voller Bracht
Oobe nyt – e Stringg e glaine
Nai s isch nid das wo iir jetzt maine
Mir hänn doch nur , mir glatte Gselle
Ins Dschunggelcämp vom Fäärnsee welle

Dr Dalai Lama, dä guet Maa
Luegt kiirzlig Basel ganz guet aa
S sigg scheen und still in unserer Stadt
Zem meditiere richtig glatt
Am rueigschte siggs, äär findets wizzig
Im Roothuus an dr Groosrootssitzig

Die Schruube doo, die hänn miir gfunde
Im Spittel im e Käller unde
Deert wo die fäält, das isch e Schogger
Hett sicher ein e Schruube logger
Die Schruube gheert, sottsch nid druff drammpe
Zem Hiftglängg, däm vom Wessels Hampe

2014

In Basel stinggts Joor uss Joor i
E weeneli als no Kemyy
Au d Abgass stingge uss em Kaare
Es schmeggt au – wenn i ein loss faare
Am meischte stinggts – jä mir seen rot
Im BVB Verwaltigsroot

Vom Ghaimdienscht dien mir vier vernää
Es haig e glaini Panne gää
Ein transleitet unseri Väärs
Hett gmaint, ai lugging, und das wäärs
Doch het e Problem är bikoo
Denn – Baseldytsch är not verstoo

Sii, das wäär so richtig toll
Super und au wundervoll
Romantisch und spektakuläär
Mega geil, scho fascht vulgäär
Ganz sympatisch und au nätt
Wenn s z Basel e kei Baustell hätt

In d Stadt kasch neggschtens nimmi faare
Unerwinscht isch deert di Kaare
Uns vier, uns macht das schuurig muff
Jä si, das reggt uns richtig uff
Im Wessels mien mir ganz glaar saage
Kei Fasnacht, ooni Waggiswaage

Dr Diräggter vo dr BVB
Kasch halber blutt im Händy gsee
Är haigi Sex vo Fraue welle
So duet me s ummenand verzelle
Das isch nid so – dä isch nid verdoorbe
Dä het fir dr neggschti Bätscheler gwoorbe

Mir dien an e ganz ganz arme dängge
Und hänn do Guetschyyn zem verschängge
In dr Notschloofstell – e scheeni Nacht
Vom Broggehuus – e neyi Dracht
Iir frooget eych jetzt sicher do
An wäär das Ganze denn sell go
Berlusconi Sililvio

Dr Schimpans Eros – im Verdraue
Sii, dä het Mie – mit siine Fraue
Si sinn jo nätt, dien ganz wild schmuuse
Sinn ganz willig, hänn viel Buuse
Do kenn är sich gar nit beschwääre,
wenn s numme keini Schwoobe wääre

Die Duube meint – ych find das bleed
Iiberal hets numme Dreet
I gangg uff Ziiri – deert kunnts guet
Well me deert fir d Veegel ebbis duet
S neyschte – ych due s grad vernää
S het e Box fir Drottwaaramsle gää

Dr Lällekeenig isch empeert
S git ebbis wo iin schuurig steert
S isch nid dr Voogel Gryff persee
Wo är duet nur dr Rugge gsee
S sinn au nid die wilde Glääber
Nei – s isch dr Arsch vom Eric Wäber

D Regierigsreet hänn schiins e Wuet
Wenn me si ganz liicht fuxe duet
Uns vier uns nimmt das doch jetzt wunder
Denn s het e paar ganz glatti drunder
Dr glätscht isch – kasch di gar nid iire
Dr Baschi – zooberscht uff dr Biire

S Angie die isch nid guet druff
Si isch so richtig suur und muff
Dr Barak dä haig spioniert
Är wiss jetzt wie si fungzioniert
Unseri Mame – die het glacht
Die het das mit uns all Daag gmacht

D Fusion vo Basel Stadt und Land
Isch e Theema – s isch bekannt
Wenn d Stadt und s Land sich zämme duet
Wäär e ganz ney Wappe guet
Mir dien an e Kängeru grad dängge
D Speese kenntsch im Sagg versängge

2013

Es gyggst und stampft, es läärmt und gracht
Dä Luminator isch e Bracht
Im Müsé Tingueli, ganz persee
Hänn mir dr Ueli Murer gsee.
Är Draimt vom Grippen, s isch absuurd
Wenn doch dä Schrott nur fliege wuurd

Yych mecht kei Auti in dr Stadt
Au Roller find yych gar nid glatt.
Dä Blätz, zwei Meter mool zwei zwanzig
Dä blybt frei,- sunscht wird ych ranzig
Es steert mi au dr Rotwyy zweier
Mit liebem Gruess – Frau Lachemeier

Im Drämmli riss yych d Fänschter uff
Mi vis a vis das isch scho muff
Was sell denn das du glaine Gnopf
Es risst mir fascht dr Huet vom Kopf
Loos alte, saag yych do ganz gschwind
Zem sörfe bruuchts e weeni Wind

Dr Santiglaus kunnt uss em Wald
Als im Dezämber wenns isch kalt
Dr Morin Guy kunnt uss dr Stadt
Als Präsidänt findet är s glatt
Dr aint schänggt Niss an groosi und au glaini
Dr ander, dä isch sälber aini

Das Schyssihyysli mues ewägg
Frei mues bliibe do dä Flägg
Mir kenne das nur unterstizze
Denn mir wänn au dä Blatz benizze
Mir wänn das do nyt aane kunnt
Denn do schysst immer unsere Hund

Vom Vogel Gryff hänn mir vernoo
Är haigi langsam Angscht bikoo
Si Fääri kunnt uss Ziircher Hand
Jä sii das isch doch allerhand
Als neggschts si- s schloot ihm uff e Ranzze
Gseet är dr Böög als wild Maa danze

Bi dr Tour de France, jä si s isch gspunn e
Weiss me nimme, wäär het gwunne
Im Amstrong het me alles gno
Wär sell die Gwinn denn jetzt bikoo
Mir wisste ebber, fescht und glai
Emine Yakin , Müncheschtai

Am Ryy do ranzzt mi s Brigitte a
Fir d Fraue sotts mee WC ha
Mir kenne das nur understize
Denn das wuurd au no andere nitze
Vom Inhalt, si, s isch nid zem lache
Ka dr Jenzer jo e Wirschtli mache

Uss em Wooghoof sinn drey uuse broche
Wo sott me die denn no verloche
Mir drey, mir dien uns das au frooge
Mir hätte e Leesig, s isch nid glooge
Leent doch die im Zolli huuse
Die Affe vo deert die geen nie uuse

Dä Clochard do, wie duurt dä mi
Isch friener ganz e nooble gsi
E riise Huus und tolli Wääge
Smoking, Laggschue stiffi Grääge
Was het dä ärmscht nur so verwandlet
Dä het mit Hello Aggzie ghandlet

Die Windreedli, sii, s macht aim wild
Verschandle s scheenschte Landschaftsbild
Expäärte mache Expäärdiise
Woaane sell die frische Briise
Stelled die ins Roothuus gschwind
Denn bloost au deert e frische Wind

Bevoor die Wält duet under goo
Hänn mir drey no aine gnoo
Mir stoose a mit Bier und Wyy
S letschte mool sell s luschtig sii
Mir hänn alle Grund zem fiire
Denn –
Zaalt hänn mir no kaini Stiire

Mir mien dr Bundesroot do loobe
Denn d Schwoobe die dien richtig toobe
Das Stüürabkommen hat kein Reiz
Mir boikotiern die ganze Schweiz
Jä macht das nur, das ischt kein Saich
Hei, das git e Morgestraich

 


2012

In Ängland ääne hett ain grisse
D UBS ganz gwaltig bschisse
Die Gselle sinn im diefschte Schloof
E kain meergt ebbis daas isch doof
Die liesse sich no s Hiirni stääle
Wenn s nit de maischte scho däät fääle

 

Mi Bueb kunnt haim und d Mamme schreit
Wo bisch au wiider umme gheit
E Loch im Sogge, dr Grind verschlaage
S Hemmli offe, ab dr Graage
“Mir hänn doch nuur” sait är und lacht
“Am Voltablatz e Feschtli gmacht”

 

Die Grieche sinn scho glatti Sieche
Wenn si kaini Schulde mieche
Napoli die scheeni Stadt
wäär ooni Abfall richtig glatt
Au Basel hätts do gar nit schwäär
Wenn nur dr Morin Guy nit wäär

 

Dä Songcontest do bi de Schwoobe
Isch dernääbe – mir dien toobe
D Rossinelli ziet e Schlappe
D Schwyz die griegt ganz bees uff d Kappe
Schigget doch – daas wäär nit gruusig
in dämm Joor e Guggemuusig

 

Wäär z wääle isch das stoot scho fescht
D bartei die stellt jo nur dr Bescht
S Volgg het z schwiige, het nit z saage
Ka sich noohäär nur beklaage
Iir frooget eich um waas es goot
E so wäält d Schwyz dr Bundesroot

 

Dr Berlusconi isch nimm doo
Wie sell das denn jetz wyters goo
D Calmy Rey die wott au nimm
jeemers nai wie isch das schlimm
Wenn das so wyter goot persee
Hänn mir bald kaini Sujet mee

 

Wenn ain duet alti Glaider draage
Sotsch nit Strolch und Luusbueb saage
S isch Schwyzer Pflicht, me het erbaarme
mit Verschupfte und mit Arme
De waisch jo nie ebb nit derbyy
Dr Hildebrannd ächt kennti sy

 

Steen Basler und Ziircher uff aim Gliid
No gseet me do kai Underschiid
Si hänn Baidi Bai – e Buuch und Äärm
E Lunge und au e baar Däärm
Gliich sinn si au wenns goot um d Laischtig
Dr ainzig Underschiid isch – gaischtig

 

Das Schuggermyysli het nit z lache
Ka nit e mool e Pause mache
Buesse schryybe, nyt mit sizze
Do kunnsch gschnäll e mool ins schwizze
Si steent “Ych mach glaub ooni Gschiss
Die blaui Zoone wiider wyss”

 

D Vreni die isch richtig schaarf
Uff dr Heinz wo hitte daarf
oobe het är nit mee aa
jetz sin nur no d Hoose draa
Do schreyt si blezzlig ganz enthemmt
es goot nimm wyter doo, s glemmt