D Biezer

2017

D’Biezer hänn phausiert.

2016

I sitz im Bruune Mutz, e Rammel nääbe mir,
är sait är haig kai Schtutz – jä Basel sig ihm z’diir.
I laad en yy, und ha eso am glyyche Daag,
em Rammel d’Schangse gää, fir si Kulduurbyydraag.

Zem Thema Baselbiet, das loot sich nit vermyyde,
han ych e ganz serieese Väärs no welle schryybe.
Doch waiss ych nit, i haa’s versuecht, es kunnt mir kaine,
wo Hülfteschanz und 80 Millioone sich dien raime.

Die Groosse baue grooss, am Rhy deert kasch es gsee,
fir glaini Biezer intressiert sich kaine mee.
Drum sin mir aane und hän au – mr hän is draut,
am Rhy-Bord unde vor em Roche Bau 1 – ains baut.

Dä Drigg vo VW het dr Blatter wunder gnoo,
Uff Drugg dr Drägg ewägg – dr Tescht denn so beschtoo.
„Trotz güätäm Mänsch hät är öi gärn“ – und fiegt no aa
bim Jüngschte Gricht e Gnopf wo n’är denn drugge kaa.

Dr Guy Morin nimmt grad e Schlugg am Apero,
Wo n’är dä Spruch: „Wir schaffen das!“ het vernoo.
„Dä kennt vo miir si!“ sait är denn, und lipft si Glaas,
Au ich schaff eebedie – mool daas mool daas.

Im IKEA han ich dr Somm vor kurzem droffe,
ganz konzentriert isch äär durchs Meebelhuus deert gloffe.
Es sin d’Recherche wo ihn deert uuse haige dryybe,
är well dr zwaite Dail vom Schweederaisli schryybe.

Eurokurs-Langväärs

Alli kenne‘s, jede weiss,
dr Eurokurs dä isch ganz heiss,
drum bi au ich dert iibre gfahre,
zem paar Fränggli kenne schpaare,
Kurz uf Weil am friene Oobe,
schnäll go Schoppe bi de Schwoobe,
s’ticke alli glich bim Schpaare grad ob arm und ryych.

Priis und Leischtig isch di credo,
aber stiilvoll muess es sii,
Billig Schwoobe Fleisch vom Grill,
e Bio-Wirschtli isch drbii.
Und voruss, das cha nid schaade,
suffsch e ginschtig Bier us Baade,
tuesch zem Spaare grad diräggt zem Hieber hindre fahre.

Chunsch vo Unter-Oberwalde,
Aargau, Zug und Baselland,
hinde füüre oobe aabe,
sälbscht vo Ziiri allerhand,
e fette Kaare tuesch du fahre,
jä bim Auto sotsch nid spaare,
Gyz findsch geil denn fühlsch di wohl im Aldi – Style.

Rambass hinde, Aargau vorne,
vor em Zoll druggts wie im Trichter,
z’hinderscht sitz dr Schtämpel-Schwoob,
und seht us wie’n’e fremde Richter,
was do durch d‘ Meerwärtstyr passiert,
het mi scho no fasziniert,
d’Kanteenlischwiizer wärde kurz no zwangsfusioniert.

Chunsch vom Gellert, hesch am Änd,
zwei Jutte-Segg no an de Händ,
e Kerbli vorne und au hinde,
zem s‘ Gepägg uff’s Velo binde,
d’Ärmel tuesch nach hindre litze,
ass bim Träte nid muesch schwitze
sogar dr Wyy kaufsch du im Allnatura yy.

Als Bänggler mach ich s’Beschte druss,
I lueg d’Lüt a vo vorne hinde,
dängg das isch doch scho verruggt,
an aim Ort so vil Sujet z‘finde,
therapeutisch gang i dra,
fang ich mit Värsli schriibe ah,
drei mi um … und schtand grad nomol hinde ah.

2015

D’ Biezer hänn phausiert.

2014

Au mir hän griischtet und is sälber lo verwanze,
Ych zwische d’Bai und äär deert unde an sim Ranze
So kaa vo do uss, graad diräggt uss däne Hoose,
dr Obama z’Amerika die Väärs mitloose.

S’isch verfaare, wo de bisch, de hersch nur spaare!
Verkaufsch di Kaare, dänggsch, jetz due-n-i ÖV faare.
Das loont sich, liis i, faarsch vo doo zem Rhy im Dramm,
vo deert nimmsch d’Fääri denn, diräggt uff Rotterdam.

Am Moorge frie – I gspyyr e Zitter und e Drugg,
I kaa nit anderscht, check e Twitter, face mi Book.
I ha e Mäldig: „Please confirm“ – Beträff: „Hey Du!“,
„I Murer Ueli“ – „want to be a friend with you.“

E Porsche ha mer kauft, dr Frau e Diamant
Luxusferie, Nerz, Champagner – allerhand
Wotsch au du das? Und – vellicht sogar no mee!
Denn mäld di aa firs Praktikum bi dr BVB!

D SVP leert is, zem Byspiil dr Hans Fehr,
Im Grosse Ganze grob, im Detail aber fair.
Und Dangg em Mörgeli, wänn d’Studis denn scho gli,
In Zuekunft anstatt Arzt, denn lieber Doggter sii.

Will d NSA duet nit nur lääse was mir schryybe,
sondern ka au see, wo mir is ummedriibe.
befiehlt dr Wessesl, glaubsch es nit, duet nit vyyl reede,
ass z Basel bald kai Auto mee sich ka beweege.

Gschpaart wird iberall, graad au bir BVB,
Bängg us Holz und d’Wääge hän kai Stääge mee.
Au s Personaal macht mit, es haut is uss de Sogge,
schyyns wurd dr Chef jetz fuudiblutt im Büro hogge.

„Shut Down“ nenne si s – e Schogg fir d USA!
Kai Stroom, kai Bus, s’goot nyt – do muesch scho Närve ha!
„Oh Mama!“ glaagt Obama, „s duet mer aifach wee,
„Wenn s Liecht denn ganz ewägg isch, kasch mi nimmi gsee!“

Drotz dääne Kischte deert, jetzt loos, das isch zem Lache!
Dr Ziircher wot kai Sex in Sexy-Boxe mache!
Sisch wie bim Schutte merggschs, drum ziehn mir do dr Schluss:
Graad vor dr Kischte kunnt dr Ziircher nit zem Schuss!

Zem Snowden sait dr Murer, s’wurd ihn intressiere,
eb d’Amis dääte au ze ihm e n Akte fiere.
No worry, sait dää grad, du bisch e glaine Fisch,
Uff Facebook „low profile“ – will d‘ kaini Frinde hesch.

D Miley Cyrus sigg bim Doggter gsi am Griine,
sie griegi Zunge nur no uuse, nimmi iine.
„Mach sBescht druss, los, i ha e Job fir di, e scheene!“,
Jetzt schafft si uff dr Poscht als Märggli-Schlägg-Maschine.

S liggt uns am Härze, s isch uns wichtig, s muess so si!
Fir Sie, fir uns, s isch s Bescht fir Basel am mym Rhy!
Muesch ebbis mache, ebbis guets, de hesch kai Waal,
mir Biezer hän entschiide und mache mit – bim „Club de Bâle“!

Es haisst im Joggeli deerfsch bald scho nimmi Baffe,
Im Stadion sRauche wänn sie generell abschaffe.
Mit Schwachstroom-Bier, kai Joint, wo aane sell daas fiere,
wenn d nooch em Matsch denn sotsch go niechtern randaliere.