Die Haiggle

2017


Mir sinn haiggel, trotzdäm doo und kemme druss
bi alternative Faggde und gfakte News
Dä postfaggdisch Zuestand duet uns d Hoffnig raube
denn bald kasch nur no dr Fifa glaube

Mit 140 Zaiche wird hütt d Wält regiert
Immene Twitter-Gwitter die aigen Intelligänz dekonstruiert
Die grangge Wälsche wäre haillos froo
Dr Schneider-Ammann wurd bim Schwätze au nid mee uuseloo

Dr Somm schrybt sich in dr BaZ fascht d Finger wund
Är wott, dass Basel ändlig e rächti Regierig bikunnt
Fascht hätti dä Versuech Erfolg kenne haa
Laider het s kaine glääse kaa

Dr Wessel freut sich und sait: „Mes chers amis!“
Bitte nämmed die Million do für s Drämmli noch St. Louis
Dääne Waggis gäbte mir vyyl mee, au dr letschi Lumpe
Sunscht dien uns scho wieder d Baselbieter abumpe

Unseri Kultur, unseri Wärt sin bedroot
Dr Handschlag verwaigere: s isch glaar dass das nid goot
Drby het au mir das nid gschmeggt
Wo mir zum Gruess dr Jogi Löw sy Hand entgegestreggt

Lägg isch dä moderat überhaupt nid brachial
Är mässigt sich, git sich richtig präsidial
Die änglisch Premierminischterin – und das isch e Faggt
Die het är brav – nur bim Händli phaggt

Demokratie destabilisiere und Näbelkerze zünde
Medie und Gricht als Geegner verkünde
Mir mergge es könnti e gaile Väärs gää
Nur wüsse mir nid, solle mir dr Kim Jong Un, dr Trump, dr Putin, dr Erdogan, dr Orban, dr Geert Wilders, Marine Le Pen oder dr Assad als Pointe nää?

E Lohn fir nüt schaffe klingt famos
Doch s bedingigsloose Grundikomme schyyteret grandios
Do froogt is dr Baschi Dürr ganz schockiert
Ob das au haisst, dass är jetzt kai Loon me kassiert

2016

Die Haiggle hänn phausiert.

2015

Mir sinn haiggel und trotzdäm koo
Extremischte uss Südwescht bis Oscht sin hoffentlig kaini doo
Angscht vor unserer Kultur schyynt si z motiviere
Jä jetz wenn mir au nümm mit de Rammel fusioniere

Sujet git s, do dien alli Bängg e Värs druff dichte
Drum dien mir uff Conchita Wurst und dr Geri Müller verzichte
Well die baide daile sich nur ai Aigenaart
Baidi Würscht draage Baart

Dr Merkel Iiri Buebe sin Wältmeischter woorde
d Freud isch gross vom Süüde bis in Noorde
Wie Heergötter spiile die in jedere Minutte
Jesses, würde die nur schwyyge so wie si schutte

D Helene Fischer bombardiert uns voll Niidertracht
24 Stund pro Daag und ootemloos durch d Nacht
Die akkustischi Quälerei finde mir extrem
Die Folterhäx isch sicher Dail vom CIA-System

In Zug e Schiff voll Bsoffeni mir gseen kai Skandal
Politiker wo nümm wüsse, was si gsait hänn, dasch normal
SVP und Grieni sin nümm z stoppe
Bi iirem gmeinsam frivole Ecopoppe

Letschti lacht mi e Myysli aa
Si straalt und straalt und macht mi aa
Wenn die so straalt, denn duen ich s mir nit verbiete
Und spigg grad zwai Jod-Dabledde zum verhiete

Je suis Charlie schrybbt, twittertet, zeichnet d Wält
Fir d Meinigsfreiheit wird die Messitsch gwäält
Au d BaZ macht mit, die sin jo nid nur doof
Ellai, deert haisst s halt: Jésus Christoph

E zwaiti Röören am Gotthard das findet s Doris scharf
Wobyy me denn in jedere nur uff ainere Spuur faare darf
Das Konzäpt verstoot d Leuthard schambaar guet
Will si jo pro Hirnhälfti nur d Hälfti bruuche duet

Ständig hörsch uss USA vo Justizirrtum
30 Joor unschuldig im Knascht, s git e riise Brimborium
Um so Fäälurdail z verhindere, die sinn jo nit dumm
bringe si bim glainschte Verdacht – halt e Schwarzen um

Si stöören e bitz. Schaad sinn si doo.
Wenn göön si wiider? Worum sinn si eigentlig koo?
Für die schwiizer Gaschtfründschaft by starggem Frangge
sottsch die als Tourischt denn au no bedangge

2014

Mir sinn haiggel – jä, und trotzdäm doo
Und schöön, sinn Dir fuule, glaine Siechen alli koo
Das sinn nit unseri Wort, wo doo d Stimmig versiesse
Nai, so duet dr Tschäppät amme Tschingge begriesse

Dr Mike Shiwa duet am Färnsee über „Yygääbig“ lalle
E knallroti Biire het dä plötzlig, s het uns gfalle
Vor em gaischtigen Aug het dä armi Maa denn gsee
Dr füüdleblutt Diräggter vo dr BVB

Wägge de Sklave in Katarrh mälde mir Bedänggen aa
„Hännd kai Angst“ sait d Fifa „mir schaffe draa“
Per Vertrag het sich Katarrh jetzt mit dr FIFA gainigt
„Jedes Brobleem wird verfolgt und ainzeln gstainigt“

Armi Lütt git s hütten immer mee Ü
berlääbe ooni Nääbejob, das isch passé
Am schlimmschte driffts, mir finde das e Schand
Sogar d Regierigsrööt im Baselland

In Dütschland outet sich e Schütteler als schwul
Nach dr Profikarriere, mir finde das cool
D Fuessballwält schreit hysterisch: „Gottseidangg!
Zum Glügg isch bis jetzt no kai Aggdive grangg.“

Luxus, Pomp und Prunk! Mir bueche Wellness für e Million
S Raisebüüro-Myysli suecht e Brogramm mit Animation
Si sait: „Für s ultimativen Aagebott sinn Dir laider z alt.“
Die exklusiv Sonderbehandlig vom Juugendaawalt.

Mir sin empöört, mir finde s e Skandal
12 000 Frangge koschtet s Joor im Club de Bâle
Das isch nid exklusiv denn vyyl me het das koschtet
Wenn mi Frau in Ziiri amme n e Handtäsche poschtet

Mit dääre Frauequote, mir wüssen nid was droot
Git s e Fiasko oder blybt alles im Loot?
Mir fürchten aber, und das mit guetem Grund,
Dass es am Änd wie bim Bachelor uusekunnt

Dr Baschi Dürr het sich e Kunschtwärgg poschtet
Das Abbild von ere lääre Google Sydde het vyyl koschtet
Die Sydden isch nid läär, gläärt uns dr Baschi uff
Do isch d Summe vo sym Lebenswärgg druff

Unter uns, mir dien wie alli Stüüren optimiere
Maximal korrupt, löön mir ys dopplet finanziere
Für mängs Amt – mir gän uns wirgglig Mieh – wäre mir prädeschtiniert
Doch laider sin die gute Jobs vo no Besseren okkupiert

Uff Schalke duet dr Berlusconi krass im Offsite stoo
D Alice Schwarzer het im Pabscht d Byychti abgnoo
Mir hänn e Sujet-Duurenand, mir sinn e bitzli grangg
Y glaub mir hänn dä Virus vo dr Konsi Bangg

Die Masseninitiative het das schööne Land gschpalte
D Wirtschaft muess jetzt wiider Kontingänt yyhalte
Imene rächte Schwyzer isch dä Volkswillen egaal
Denn d Butzfrau dehai schafft au in Zuekumpft illegaal

Die Feme rennen umme mit entblööster Bruscht
Fuchtle mit de Möps voll Kampfesluscht
Mir engagieren uns bi dääre politische Gruppe
Und göön jetzt grad in näggschte Fuudischubbe

2013

Mir sinn haiggel und wüsse wie das goot
Es zellt was de mainsch, und nid wär was verstoot
Das Gsprööch het dä Schiri fääl interpretiert
wo dr Hitzfäld allei mit sym Mittelfinger fiert

Im Beyeler an dr Vernisage stoot ohni Grund
Vom Jeff Koons dä riisegrooss, uffbloose Hund
Dehai hänn mir das denn au probiert
Doch laider isch drbyy unsere Puudel explodiert

S ganze Köönigryych duet sich empööre
D oben-ohne Fotene vo dr Kate dien verstööre
Als Bebbi kenne mir das wirgligg nid verstoo
D Fotene vom Baschi Dürr sin alli eso

Krawall machen, Unrueh stifte, randaliere
in Tumult ussbräche, tooben, explodiere
Lärme, kraische, Züüg ummeschmaisse
Aigentlig dien mir Pussy Riot haisse

Mir sammle Kuriosidääte, hänn ganz e bsunders Exponaat
S het en Eehreplatz im Kabinett und stoot separaat
Si frooge was das isch, mir saage s dezänt
Es isch dr aller-allerletscht BaZ-Abonnänt

An dr Züürcher Uni duet sich dr Mörgeli bewäärbe
Är kennt die Uni guet und könnt logger Räggder wäärde
Näb de Stärggene kenni är – und das isch ussergwöönlig –
vo däären Uni d Schwachstell persöönlig

In Ägypte herrsche jetz d Islamischte
Das sinn kaini Fundis, sondern fascht scho Feminischte
Die steergge d Frauerächt im Noochen Oschte
Denn die dörfe schynts scho jetz ellai go Burkas boschte

2001 groundet är d Swissair e bitz
Jetz keit dr Moritz Sutter mit dr Hello uff d Schnitz
Schyynts het dä erfolgsverwöönti Maa
Syni Finger au bim Dreamliner dinne kaa

Fir si Billig-Flieger isch dr Ueli am Batze zelle
Fir die bescht Armee het är die beschte Flieger welle
Dodrzue bruuchsch kai Flieger, das hämmir gsee
Denn die bescht in Gottes Nammen isch d Heilsarmee

Är het e Staat gfiert und Schulde gmacht wie veruggt
het ussgää und sich denne verdruggt
Dr Balmer maint: „So wien yych euch dää Staat hinterloo,
sott statt dr EU yych dr Nobällbryys bikoo“

S Unwort vom Joor isch Bio woorde
Schrybsch Unwort an Unwort und losch es überboorde
Dilletiersch, pfuschisch umme, e riise Stümperei
Griegsch am Schluss d Bio-Graphie vom Alex Frei

Yynen, Uuse, nomol yyne und no schnäller wider uuse
Luegsch s genau aa, könnt das Schpiil fascht scho gruuse
Dä Rhythmus liggt im Bluet und isch nid schwiirig
Drum kunnt dr Berlusconi wiider yyne in d Regierig

Är muess spaare, mir verstöön syy: „Adieu“
Är leert jetzt russisch, dr Gerard Depardieu
Am maischte kann är spaare het är eruiert
Wenn er statt Bordeaux nur no Vodka deguschtiert

Am 21. Dezämber isch s uns bassiert
Kurz vor den Elfe, mir hänn fascht hyperventiliert
Mir hänns erläbt und hänn d Wält nümm verstande
Im Ganze sinn vier Kunden in dr Märthalle gstande

Basel isch gfäärlig, und das isch nid glooge
Mir dien uns fascht nümm uff d Stroosse wooge
Jetz muesch scho uffpasse, bi all dääre Gwalt
Dass dr nid en Öschtryycher vor dynny Fiess knallt

Är bschisst, är liegt und manipuliert
Dr Armstrong het digg abkassiert
Uns byychtet är, für das git s en Oorde
Um e Hoor wär är Investmentbängger woorde

Wenn d kunsch wie d wotsch und dä goot wo maag
Nennt sich daas an dr Schuel Jokerdaag
Isch dr daas z vyyl Presänz, denn bassisch am Änd
No schampar guet ins Parlamänt


2012

Dr Philipp Hildebrand het si Job verloore
D Mainige göön ussenand in allne Foore
Nur dr Paabscht lächlet still, und dänggt sich ganz genau
Isch daas e Glügg hann yych kai Frau

 

Im Kindsgi döörfe d Biinli kaini Bliemli me liebe
Plüschschlängli dien mit Stoffschnäggen iiebe
Als Leermittel bringe die in dr Schuel denn no voll
Im Strauss-Kahn sy Verhöörprotokoll

 

Unsere Junge frogt mi uss em Physikuntericht
Was isch schwärer: Massen oder Gwicht
Souverään ergläär ych daas, will ych ha das voll im Griff
Ebbe genau so wie dä Typ uff däm Krüzfaartsschiff

 

Mit em Glainschte hänn mir uff d’Herbschtmäss welle
Do grinse vo links und rächts fürchterligi Gselle
E Haidenangscht het sich mit me Gruusle paart
Die Fluet vo Waalplakaat hänn mir d Gaischterbaan denn gspaart

 

Dr Muurer sait zur beschten Armee vo dr Wält
Im näggschte WK göön mir nid ins Fäld
Sondern in d IKEA und leeren ohni Hetze
Dä schwedisch Billigflieger zämme setze

 

Jetzt hänn mir dänggt die UBS-Bängger hänn nyt gleert
Dr Sand in Kopf gsteggt oder umgekeert
Drby sueche die im Sand i mach e Wett
Das Gäld wo dr Adoboli in Sand gsetzt hett

 

Dr Christian Wulff leggt sich mit de Medien aa
Är droht mit Krieg dä politisch Maa
Bi uns wääre die Lämbbe nie escaliert
Denn doo schrybt dr Somm, was dr Blocher diggtiert

 

Dr Hampe Gass seit jetze: s’längt
E Wiiderwaal nimmt är nid emolle gschänggt
Fiir die Wytsicht mien mir dä Maa aifach liebe
Denn ür sii Banggsion duet är syt mängem Joor scho iebe

 

D Basler Zyttig het e neu Gschäftsmodäll
S luttet: Ohni Inhalt und nid ganz häll
Innovativ syygi daas und e völlig neuen Aalauf
Mir nenne s kurz: medialer Leerverkauf

 

Wenn de wirgglig gwünne willsch, denn darfsch di Zyyl nid verfääle
Als Trainer daarfsch au nid dä mit dr gröschte Schnuure wääle
Und für e Sturm bruchsch denn no die räche Lütt
Sunscht bringt au dr gröschti Sturm uff s Stöggli nütt