Mac Väärs’s

-> Doo wirdsch Fan vo de Mac Väärs’s uff Facebook

2017


Dr Minu goot zem Glaaraboschte
Dr Schugger frogt was äär do well
Är haig uff Youtube iire Spott gsee
Fir d Bolizei daas wär si Stell
Är sig zwoor nit so guet bim schiesse
Wenns Äggschen git fääl im dr Muet
Au mit de Handschälle sigs schwiirig
Aber im filme sig äär guet

Bim Bachelor letschte Novämber
Het die us Basel miese go
Zimmlig druurig und erniechternd
Het si dr Fluug in d Haimed gno
Im Fluugi het si aafoo briele
Dasch glaar ass de so schluchze duesch
Mir zwai wurde gnau so hyyle
Wennd waisch ass in Ziiri lande muesch

Das Pokemon flitzt queer durch Basel
Macht alli Lyt e glai närvees
S gseet komisch us, s het kaini Hoor me
Luegt luschtig dri und gaar nit bees
Das isch kai Pokemon du Duubel
Het äär denn gsait und ych has grafft
Wo denn das Männli gligglig juublet
Im 2te Waalgang hanis gschafft

Am Eltereoobe sait dr Leerer
Si iire Sohn dää isch scho rächt
In Mathe, Geo isch är super
Nur s Franz isch laider grotteschlächt
Dahai saag ych denn ze mym Junge
Du waisch jo scho waas es jetz schloot
Wenn dis Franzeesisch wyter schlächt blybt
Wirdsch speeter heggschtens Bundesroot

Wenn d Freizyt z Basel duesch verbringe
Ob Summer, Winter isch egal
Shoppe, Foxtrail, und Ü30ig
Die Uuswaal isch schlichtwäg brutal
Dr FC Basel s Kunschtmuseum
Oder go breetle deert am Ryy
Und willsch fir d Kinder e Erlääbnis
Zaigsch ne dr Gloon im Zirkus Knie

Dä Eric Wäber isch e Bombe
Är het si Abgang sälber gwäält
Uf d Froog worum, sait är ganz gmietlig
Är haig jetz alli lang gnueg quäält
Si Zuekunft seet är aber roosig
Denn är sig sportlig, smart und schlau
Und was iin sälber au verblüfft haig
In ere Nati sig äär au

Jetz bloost Dr Baschi Dürr zem Aagriff
Do macht dr Lips e gligglig Gsicht
Die Schugger mitme Fäälverhalte
Sige agääblig jetz bald Gschicht
Mir kenne aine wo kennt hälfe
Wo sicher fir die Arbet brennt
Denn fuuli Aier wärde sofoort
Vom Jogi Löw am Gschmagg erkennt

Das d Schwoobe an dr letschte EM
Nit gwinne het me gschnäll entdeggt
Ze allem aane sait dr Jogi
Es haig en dunggt, ass es fuul schmeggt
Jetz under uns mir zwai mir finde
Das Pfiffli-Spiili nit so schlimm
Denn im Verglyych zem Gerri Müller
Losst en dr Löw weenigschtens dinn

Jetz sin die Granggekasseprämie
Scho wiider gstyyge, dasch nit schigg
Ai Ursach isch lut so-ne-re Studie
Es sig schyyns jeede zwaite z digg
Jä wenn daas wiirgglig so duet stimme
Die Ussag isch e gli gemain
Denn wäär vo uns ain iibergwichtig
Dasch alles glooge ych see kain

Dr Trump dä phoned gschnäll im Obama
Und sait los Digge s isch eso
Du muesch mr jetz doch aimool hälfe
Aber verzell joo kaim dervoo
I hogg sit zwai Daag in däm runde
Byyroo und schiff gli undere Disch
Drumm bitte saag mr jetz ganz dringend
Wo die schaiss Ussgangsdiire isch

Dr Trump sait letschti zem Obama
I ha mit dääre Angi mie
Bi jeedem mool wenn mir dien skype
Isch si nur muff, do lacht si nie
Das isch ganz aifach sait dr Barak
Dä Drigg das isch e alte Zopf
Wenn d wiirgglig willsch ass die duet lächle
Denn draaisch dr Bildschirm uffe Kopf

Me sait fir vyyli statt fir weenig
Fir daas stoot d SP immer ii
D SVP seet daas gli anderscht
„Frei bleiben“, das sott s Motto si
Als Grischt saisch, „liebe deine Nächste“
Und das nimmt d CVP genau
S Brobleem bim Darbellay so heert me
Isch daas nit immer d Ehefrau

Dr Roger isch nimm in de Top10
Jä s gwinne fallt im langsam schwäär
Und au bim Simon Amman dängg ych
Sin d Batteryye langsam läär
Fruschtriert isch au dr Carlo Janka
Und nooch em Renne nur schlächt gluunt
Es schisst en aa wenn dää ins Zyyl kunnt
Hän die das immer scho veruumt

Langväärs

Globaalisierig an dr Faasnacht, mir zwai dängge s wär no glatt
So vyyl Veelgger an de scheenschte drei Daag, do in userer Stadt
S wurde sicher vyyli ko nit ganz alli, numme fascht
Diirge wäre glaub verhinderet denn die maischte sin im Knascht

„Morgestraich vorwärts marsch“ heert me uff de Strosse dusse
Die erschti usswärtigi Clique wo mir deert seen das sin d Russe
Si sprinte loos, ooni halt bis zem Ändstraich dasch dr Plausch
Und das schaffsch wennd vor dr Fasnacht bitzli EPO iine hausch

Zwai Stund z spoot zem Morgestraich kemme äntlig denn au d Pole
Si hän zerscht no fir dr Cortége soo-ne Waggiswaage gstoole
Und au d Amis sin gli z spoot, die hän aber gar nyt klaut
Wo si d Mexikaner gsee hän, hän si gschnäll e Muure baut

Am Cortége stoot denn uff em Barfi soo-ne Gruppe armi Sieche
50ig Lyt und nur zwai Drummle, das isch d Clique vo de Grieche
Au Thailänder sin willkomme und das machtne riise Spass
Und die hän sogar e aigne Käller in dr Ochsegass

Die ganzi Route kunnt ins stogge, was isch los frogt aine barsch
D Iire laufe uff dr falsche Syte stuur im Kontermarsch
Im Cortége hets bletzlig e Lugge und das isch nit graad dr Hit
Do wär d Clique vo de Britte doch die mache niene mit

Wiirgglig stolz uf iiri Goschdym isch au d Clique vo de Inder
Seer filigraan und scheen verziert sin die gnaait vo iirne Kinder
Au d Gruppe us Afganischtan bringt vyyl scheeni Sache mit
S Brobleem isch under e-me Goschdym seesch dr Sprängstoffgirtel nit

Bitzli anderscht sin d Isländer, die dien nit sälber Muusig mache
Nai die sitze in de Käller und dien ab de Väärsli lache
Und falls mool ain nit so luschtig isch oder e alte Huet
Gits drotzdäm Applaus, denn ains isch klar, im Klatsche sin si guet

Nooch em Ändstraich ischs verbyy, nur d Russe seggle no gli umme
No dis no dien au Tailänder in dr Ochsegass verstumme
Chinese, Schwede und au d Lette geen ins Bett mit miede Bai
Numme d Pole geen zem Abschiid grad mit unsrem Auto hai

2016

Volggswaage het e bitzli bschysse
Uff dr erscht Bligg isch das scho schlimm
Do kennte vyyli als no maine
E soone Kaare kauff i nimm
Doch bim gnauere bedrachte
e Mänge het das nimm bresännt
Sin d Abgaaswäärt halt bi de Schwoobe
Uss Dradizioon nit transparänt

E Glepfer oder au e Brootwuurscht
Daas z ässe isch nimm ganz so schlau
Mir zwai hän do kaini Bedängge
Vom Minu wisse mirs genau
Äär het uns gsait was in dr Braggsis
alles no beachte muesch
Die Wirscht sin absolut ungfäärlig
Wenn se nit abeschlugge duesch

Letschti hän mir do im Fäärnsee
in dr Daagesschau daas gsee
Vom Balkan här die vyyle Flichtling
das isch jo schlimm ojemine
denn hän mir umgstellt uff dr Fuessball
D Schwyzer Nati spyylt hit au
Nur wo die Mannschaft denn uffs Fäld kunnt
Seets uss wie bi dr Daagesschau

Sie – sid die glai Martullo Blocher
in Nazionalroot zooge isch
Het die greftig afo schreie
Und haut au mächtig uff e Disch
Mache si sich nur kaini Soorge
Drifft si au nit dr richtig Doon
Jä das Verhalte isch ganz loogisch
Denn wie dr Babbe so dr Soon

Als Flichtling z Gänf do heschs nit aifach
Dr ganz Daag butze ooni Loon
Au in Ziiri ischs nit besser
Froonarbet laischte dasch e Hoon
Au z Lausanne Z Bärn und in Lugano
Wärde die wie Sklave gweelt
Nur do in Basel das isch suuper
Wirdsch graad in Nazionalroot gweelt

Das unsere Federer nimm so guet isch
Das het ai ganz bestimmte Grund
Mit so vyyl Kinder in däm Alter
Bisch dotaal mied und uff em Hund
Roger loos, du sottsch meer schlooffe
Denn gwinnsch au wiider mool e Satz
Machs wie dr Wawrika, denn dä kunnt
Graad im Bytschaama uff e Blatz

Si, under uns deert in däm Prattele
Het d Bolizei scho rächt versait
Nooch dääre Bombedrohig haig me
Die ganzi Sach denn widerlait
Als Fäälalarm het mes bergindet
I glaub do laufft ebbis verkeert
Denn mir sin gescht noonemool deert aane
Und d Bombeleeger sin no deert

Dr Christoph Mörgeli dä aarmi
Hoggt jetz dehai und het nit z due
Ooni Job im Nazionaalroot
Het d Schwyz jetz äntlig vo em Rue
Nur in belaschtet daas scho zimlig
Är fielt sich sit däm ganz elai
Är fluecht, jetz kumm i mr no vor wie,
Im Esteriore si letschts Ai

Dää fetti Maa us Nordkorea
Het schyyns e Bembli ussbrobiert
Angscht und Bang ischs aim deert worde
Denn d Äärde het ganz fescht vibriert
Uss Wasserstoff haig die bestande
Do hänn mir zwai gschnäll reagiert
Und graad verkindet dasch kai Bombe
Dämm isch der Grind nur explodiert

Langväärs Laadestärbe

Letschti hän mir do in Baasel welle Underhoose kauffe
Sig schyyns besser hän mir gheert, wäägem bammbele bim lauffe
Nur in Baasel ebbis z finde das isch no e rächti Gschicht
Denn wie mir jo alli wisse sin die maischte Lääde dicht.

Suechsch e Laade in dr Staine, kasch es graad emool vergässe
Usser suffe, chille, rauche, kasch do heggschtens no go ässe
E Ueli do, e Stange deert und am Änd vo dääre Gschicht
Hesch no immer kaini Underhoose jä derfiir bisch dicht

Willsch e Sushi goosch zer Uschi nur bewusst muesch du dir syy
Ob Negishi, Yoko, Oishii, dä Fisch kunnt nit usem Ryy
Au e Yyglemmts isch vom Subway zwischeduure verry nice
Und falls das denn noonig längt, dr Mr. Wong het no „fleit leis“

Pizza griegsch bim Salvatore, fir Maa Mee do goosch zer Ying
Willsch e Döner goosch zem Achmed, nur waisch deert nie was isch drinn
Schaarf mit allem, kasch denn bstelle, Joghurt-Sauce isch au rächt
Mir hän no immer kaini Underhoose, lägg isch uns jetz schlächt

Denn hän mir e Laade gfunde und dä haisst Beate Use
Hösch do inne gits baar Underhoose, du die sin zem gruuse
Nur drei Schnierli und e Zipfel, sicher unbequem bim hogge
Jä wenn ich mir das so aalueg, du do längt mer au e Sogge

D Uuswaal isch do inne gross, s git schwarzi, rooti und die pinke
Bletzlig gsee i vo ganz hinde foot dr Minu afo wingge
Är kunnt neecher und sait siesslig, gäll do het me d Quaal der Waal
Wenn dä wüsst wie rächt är het, jetz wär i froo s gäbt baar us Staal

Au z Glaibasel isch nit besser duesch vergääblig aane laufe
Im Klingeli deert griegsch no Schnägge, und au Ässe kaasch deert kauffe
Im Roote Kaater no e Cüpli sone Gumsle nääbe draa
Und denn sait si no, dasch luschtig, ych ha au nit drunter aa

Im Stücki uss wäär no e Chance und Blatz hesch deert sicher au
Nur wo mir deert iine laufe isch es zue und gseesch kai Sau
Jo am Iigang hängt e Schild, Heute machen wir bitz frei
D Effnigszyte sin wie immer vom Zwai bis viertelvor Drei

Ob mir schlussändlig gfunde hän, was mir hän welle kaufe
Und ob das Broblem vom bammbele jetz nimm bestoot bim lauffe
Wäärde mir eich nit verroote, sit Joore sin mir do nit gwillt
Und so kenne dir au wyter frooge, waas hesch underem Kilt

2015

Im Fuessball isch Luzärn am Boode
Drum het dr Alex miesse goo
An de Spiiler kennts nit ligge
Das het me us dr Präss vernoo
E baar mool gwinne zwischeduure
Ych hätt e Leesig fir dä Wunsch
Als Trainer nimmsch d Natascha Kampusch
Die waiss wied uss em Käller kunnsch

In Zug verdailt me an de Feschtli
KO-Dropfe ooni dass des waisch
Die logisch Kosequänz druffabe
Waisch nim was machsch oder was saisch
Das isch bim Eric Wäber äänlig
Jä dä parade Phausegloon
Bi däm sim Gschnuur do sin mir sicher
Nimmt dä das Zyyg als Infusion

Das NAI zer Fusionsabstimmig
Das het uns zerscht gli iiritiert
Doch bim gnauere bedrachte
Hän mir dää Voordail schnäll kapiert
Do sin mir danggbar und s isch logisch
Das die vom Land so stimme mien
so blyybe 2 Kanteen wo uns no
zum Gligg vo Ziiri trenne dien

Du, dä Skandaal vom Bindnerland isch
E Sauerei, y finds nit rächt
Das Gammelflaisch so dyyr z verghauffe
Wenn ych dra dängg do wird’s mr schlächt
Do wirdsch jo dääglig nur aaglooge
Hösch Digge mach dr nit in Strumpf
So laufts halt bi däm Carna Grischa
He nai, y main doch d Widmer-Schlumpf

Basel isch, wie halt so iiblig
Dr ganze Schwyz e Schritt voruss
Bim integriiere vo vyyl neiem
Macht uns au s Fremde nit vyyl uss
Das Ecopop isch au ghai Thema
Mir hoole d Lyt in grosser Zaal
Und importiere unsri Schwoobe
Im Dramm jetz CO2 neitraal

Die CIA duet schyyns doch foltere
Psychisch und physisch sisch brutal
Joorelangi Underdriggig
Deert kunsch nimm fuurt de hesch kai Waal
fir uns zwai wär das nit so dragisch
Das isch kai Sach das sag ych dir
Jä an so Folter gweensch di wenn de
E Schwigermuetter hesch wie mir

Dr Hampe Wessels isch begaischteret
Vo dere Seggredääryn z Bärn
E soone freizygigi Daame
Hät äär im Byyroo au seer gäärn
Und zwischeduure mool e Quicky
Derno e Bier und Sie e Flute
Nur wär das Ganze vellig sinnlos
Denn vo Verkeer verstoot dä nüt
D OSZE do unde z Baasel
Das het Vorschrifte gä wie wild
Alli Lääde sin verriglet
Die halbi Stadt e schregglig Bild
Falls me Verdäächtigs wurd entdegge
Do wurd me denn uff alles schiesse
Do hani d Schwigermuetter grad gschiggt
Go frischi Luft ans Fänschter z gniesse

Das die Soldaate so schlächt Ziele
Hät y nit dänggt das macht mi muff
Vorallem het mi Schwiegermuetter
Die Fintä gschmeggt, ou lägg das Buff
Y ha mi denn au graad entschuldigt
Und ha s Verhältnis wiider gfliggt
Und ha se denn so zer Verseenig
Zem Kim Jong Un in d Ferie gschiggt

Dr Geri Müller zaigt sis Schnääbi
Ych find das jetz nur halb so wild
E soone alte Schrumpelhuffe
Dä gseesch jo fascht nit uf däm Bild
Und sin mir eerlig, in dr Zytig
Isch zue sim Bild au no e Bricht
Do froog ych mi bim Geri Müller
Isch das si Arsch oder si Gsicht?

Dr Simon Ammann uff dr Schanze
Dr Absprung isch mool nit so schlächt
Und in dr Luft das ka me saage
Jä du dä Flug dää isch scho rächt
Nur was denn folgt daas isch nit luschtig
Ganz schlimm dr Schluss vo dere Gschicht
Statt uff de Fiess und uff de Brätter
Landet dä voll uf em …
… Aatemloos hän mir das gsee
Wenn das bassiert hesch d Schnuure voll Schnee
Mir hän dänggt es wäär no toll
Hät dä Thurnheer d Schnuure au mool so voll
Zem Gligg sin denn au graad zwai Sanis ko
Hän im Simi si Zingge uss em Schnee uuse gnoo
Die zwai hän gschafft zimmlig haart
Aine mit Glatze dr ander mit Baart
Charli heb do an de Bai
Mohamed nimm d Ärm und denn uff zwai
Aatemloos häns en zu zwait
Als Iis am Stiel vo dr Pischte draait
Daas het uns glängt mir hän dr Sänder umgstellt
Und d Abfaart gluegt das isch au gschnäll verzellt
Ou lägg doch mir das kaas doch nit si
Die Schwyzer Faarer hän no d Fäll an de Ski
Aatemloos hän mir zer Kenntnis gnoo
Bis die im Ziel sin isch das gar nimmi do
Denn sait dr Spiiker in sym Bricht
Do isch jo dr Simi gschnäller uff sym Gsicht

2014

S Verbott zem Burka drage findet
D Frau Widmer-Schlumpf perseenlig schlächt
Das scheene Glaidigsschtigg z verbiete
Bolytisch, ethisch sigs nit rächt
Mir zwai sin vellig deere Mainig
Und hän dä Standphunggt nei entdeggt
Perseenlig kennt die Frau nur gwinne
Wenn die au ihr Gsicht verdeggt

Dr Phabscht het nit me gege Schwuuli
Dä isch scho zimmlig dollerant
Är isch modäärn, am Boode blyybe
Nur was jetz kunnt isch allerhand
Au Gummis deerft me jetz benutze
Jetz längts do ha-n-i d’Schnuure voll
50ig Joor friener und es gäbt hit
Kai Eric Weber waisch wie doll

Dr Obama jä dä Gueti
Isch jetz voll desillusioniert
Me haigi ganz ooni si Wisse
Die dytsch Regierig infiltriert
Was är do alles haig erfaare
Do stoggt em s Bluet är sait nur wow
Es sig schyyns so dä Angi Merkel
Dasch gaar kai Maa das isch e Frau

Dr Flichtlingsstroom in Lampedusa
Dä isch unglaublig s nimmt kai Änd
Kaine will vo deene zrugg go
Die weere sich mit Fiessess und Händ
Bald wäärde die in d Schwyz iiwandere
Dasch kei Brobleem dängge mir Zwai
Wenn die dr Shiva Mike denn gsee hän (Geri Müller)
Geen die vo sälber wiider Hai

Do het me glatt vom zwaite Wältgrieg
So Bilder gfunde daas isch doll
Die haig me alli kenne rette
Us Nazihänd dasch wundervoll
Was uns do wiirgglig duet erstuune
Das haut uns um mir geen uff d’Gnei
Dass die deert näb däm ganze kämpfe
No so vyyl gmoolt hän isch is nei

Dr Baschi Dürr het in sim Byyroo
E so-ne Google Bild jetz dinn
Zerscht hani das nit ganz verstande
10-Dausig Stutz, i glaub i spinn
Denn ha-n-is bletzlig afo schnalle
Die Kinschtlere hets druff was sunscht
Wenn aini sait si bruucht ai Wuche
Fir copy-paste, dasch wiirgglig Kunscht

D Sälbschthilfegruppe Zimmerlinde
Isch uff dr ganze Wält bikannt
Mobbing, Drooge, Sex bim schaffe
So Theme wäärde deert erkannt
Derbyy sin Clinton, Berlusconi
Dr Sarkozy het me au gsee
Das sin nur drei vo deene Veegel
Dr Räscht isch vo dr BVB

Letschti in Ziiri, s isch zem schreie
Mir hän e WC gsuecht wie wild
Hey lueg do hets ains, sait dä bletzlig
Verrichtigsbox stoot uf däm Schild
50 Stutz sait d WC-Dame
I glaub die spinnt, i has verhebt
Nai s’isch nit s Gäld gsi wo mi gschteert het
Nur hätts mr en bim schiffe ghebt

Dr Djokovic sait ze sim Trainer
Loos Bobbeli es isch eso
Mi Frindin Jelena isch schwanger
Gescht Zoobe hani das vernoo
Dr Djokovic isch uss em Hiisli
Dr Becker frait sich au exreem
Und hofft fir sich das Baby haig denn
Kai rooti Hoor, sunscht gits Brobleem

Dr Justin Bieber isch verhaftet
Do sait dr Richter loos du Goof
Suffe, Kiffe und den Faare
I glaub du bisch e bitzli doof
Das sin doch alles nur Lappaalie
Wo mir das gheert hän hän mir dänggt
So baar Verstees ka me verkrafte
Aber firs singe gheert dää ghängt

Wos d Angi Merkel deert bim speertle
Gepflägt mool uss dr Bindig haut
Het me si sofoort ins Spital brocht
Das het e-re d’Feerie grad versaut
No schlimmer isch denn Diagnoose
Vom Arzt wo näb em Bettli stoot
Me haig zwar d’Gnoche kenne fligge
Aber firs Gsicht sig alles z’spoot

Dr Offizier dr Matthias Stähli
Isch jetz nei bi dr Bolizei
Bim bewäärbe sigs gli schreeg gsi
Es isch halt alles bitzli nei
Bim Baschi Dürr het är voorgschproche
Und gsait är wurd si Arm verwette
Ass är pherfäggt derzue wurd passe
Denn är kenn wirgglig super Glette

Im Bundeshuus deert oobe z’Bärn, hän sich die Bundesreet mool droffe
Dr Johann Amman kunnt gli z’spoot, är haig gescht zoobe halt z’vyyl gsoffe
Himmel druurig seet är us, dä Kater isch die rainschtig Gwaal
D Widmer-Schlumpf seet nit vyyl besser us nur deert isch daas normal

Au dr Ueli isch nit umme, är fiel sich rekonvaleszänt
Dumme Saich dä hoggt wie immer dängg im falsche Barlamänt
Wo är kunnt, es däch em laid, är haigi nur Schpiegelaier kocht
Und die Aier mit-me Kaffi im Christoph Blocher no gschnäll brocht

Jetz ergrifft är au grad s Wort, unsri Armee die isch am Ändi
S isch heggschti Zyt fir unsri Schwyzer bruuchts bolitisch gsee e Wändi
Dä Grippen isch essenziell, d Landesverdaidigung isch schlimm
Denn was ihr vellicht nit wisset, so vyyl Fluugi hän mir nimm

Letschti sig är au no gsi, die bescht Armee go z’inschpiziere
Bim Granadewäärfe sait dr Lytnant, Ueli muesch bresiere
Zellsch uf aine, -zwai, -dreiezwanzig, jäwoll verstande hier
Dr Ueli het gli Mie mit zelle, explodiert isch si bi 4

Bim näggschte Thema Asylante, jä do isch me sich nit ainig
Es bruucht mee, sig guet fir d’Wirtschaft, isch vom lingge Laager d’Mainig
Nach dr Debatte wartet jeede, was vom Ueli Statement blyybt
Nur froogt dä sich immer no, Asylant, wie me daas schryybt

Zem die Sach no gli z’verdiefe und besser hinter s Ganze z bligge
Het me 30 neij Asylante ins Bundeshuus lo schigge
Ko sin laider numme 2, mit e-me-ne Brief dä isch gli gweer
Jä dr Räscht sig no am butze, scheene Gruess eire Hans Fehr

Dä Obama und die Amis, jä das sin scho zimmlig hooli
Bim Stritt um unser Banggghaimniss biete mir parooli
Das maint d Leuthart und verzellt, si haig do no e Drumpf
Kumm mir mache däm Obama Angscht und schigge d’Widmer-Schlumpf

Dr Berset Alain schriitet ii, das kenn me doch jetz so nit saage
D Evelin die armi Frau sig doch vom ussee här z’vertraage
D Simonetta stoot au uff und sait, los Alain so isch d’Laag
Ych ha au nit geeg die Frau doch ych verschrigg au jeede Daag
Jetz kunnt Lääbe in die Sach d’Evelin foot sich a weere
Wenn mir scho so eerlig sin, dien mir das Blatt au mool keere
D Simonatta Tartaruga haig jo vellicht scheeni Bai
Nur längt deert dr IQ nit emool zem hiete vo baar Stai

Jetz git ai Word au graad s ander, dää sig dumm und die wurd liege
Das isch z vyyl gsi fir dr Alain, scho kunnt s Invendaar ko z’fliege
Äntlig isch mool ebbis loos dänggt dr Brukhalter ganz beherrscht
Und haut im Ueli baar an Kessel, super, Freude herrscht

Mir zwai dängge ganz im Ärnscht, es bruuchti meer so Emozioone
Jä bi so vyyl Energyy wurde sich die Siibe no loone
Aggtuell isch d Formle so, s isch vier mool Maa und drei mool Frau
Mir sin sicher liebi Frinde – Siibe vo Eich däätes au

2013


5Kilo Hasch, Marihuana
Amphetamin und LSD
Koki, Crack in glaine Phäggli
Bolle, Bille und no mee
Bim Handel mit so milde Mittel
Do kunnsch ganz sicher immer Hai
Willsch zer Elite bi de Schmuggler
Goosch in d Diirggei und glausch e Stai

Dr Sarkozy het d’Waal verloore
Är hets nit sportlig kenne nää
Greessi z’zaige isch nit aifach
Erscht rächt bi nur aim Meeter 10
Doch s’Angi Merkel isch begaischteret
Unglaublig wie si sich do freu
E Dräffe mool uff Augeheechi
Und si muess ändlig nimm uf d’Gneu

Wo ych am Färnseh letscht Oggtober
Dä Fallschiirmsprung gebannt gluegt ha
Isch mir mi Häärzli fascht in d’Hoose
Ganz eerlig gsait, Angscht hani gha
Mi het’s verwunderet s’isch unglaublig
S’het alles glappt und funggtioniert
Gisch aim us Eeschtryych so viyyl Gaas mit
Waiss me jo nie waas no bassiert

Gstoche schaarf in-e-re Zytig
Zaigt d’Brinzäss Kate die naggti Bruscht
Zwai Syte wyter isch dr Harry
Und zaigt si Gmächt, är haig grad Luscht
Dass daas jetz nimmi ka bassiere
Fir d’Zuekunft het me das entdeggt
Muess dr Charles immer mit uffs Foti
Ei Oor und alles isch verdeggt

D’Versicherig frogt dr Herr Maier
Bim Wasserschaade ändi Joor?
Do hän Si d’Fyyrweer nit iigschalte
Sin Si do sicher, isch das woor?
Dr Grund sig noonig ganz ersichtlig
Dr Maier sait e gli fruschtriert
Sige si froh ischs numme Wasser
Wär d’Fiirweer ko, wärs explodiert

Bim Styyrabkomme mit de Schwoobe
Do ka me saage, s’lauft nit rund
E rächte Maa miesst do ins Renne
Und kämpfe fir dr Schwyzer Bund
Dr Guy Morrin wär doch die Leesig
Mit Birkestegg und Lispelä
Zer Understizig no dr Minu
Und dä wurd d’Ruggedeggig gä

Mir hän uns dänggt so noch dr Fasnacht
E glaini Party wäär no toll
So vellig ungezwunge feschte
Wenn d Luscht hesch jä denn kunnsch emool
Und d’Effnigszyte, das isch aifach
Dass di Terminblaan au nit killsch
Mache miir das im Gfängnis Wooghof
Denn deert kasch koo und goo wennd willsch

Mi glaine Sohn de kaschs kuum glaube
Isch jetzt doch in dr 2te Glass
Das ganze Schryybe, Rächne leerne
das gfallt däm sehr und macht ihm Spass
Fir d’Brueffswaal speeter isch das super
Ich hät im do e guete Root
Är waiss jetzt 4+4 git 18
Und ka diräggt in Ständeroot.

FCB

Aafaangs Saison hesch gli gsee , dass Joor isch Basel nit dr Leader
Fir die Buebe hän mir dänggt, wär wool Gluggere doch gschiider
D’Iiberlägehait isch fuurt, wie het das nur kenne ko
Zwai drei Sache het’s scho gee, die verzelle mir Eich do

Dr Staini griegt dr Ball vo hinde, sprinntet loos vellig besässe
Laider het är bi däm Spuurt au grad dr Ball hinde vergässe
Wo dä flangge will do merggt är’s und es isch ihm niene wool
Wenigschtens dängg ych bi mir, schiesst dä so au kai Aigegool

Kovac, Sauro, Joo Ho Park, Salah, Diaz und dr Yapi
Kwang Ryong Pak, Jevic, Zoua und au suscht irgend e Lappi
Jeede schreit in syynere Muetersprooch, dä Mix isch schlicht dr Hit
„Schwätz doch dytsch“ schreit denn dr Alex, Suaheli ka är nit

10 Minute z’spoot zem Spiil kunnt dr Murat, s’isch e Glatte
S’dääch em laid aber das Dreiraad vo dr Mueter haig e Blatte
5 Minute vor dr Pause sait är tschüss wär hät das dänggt
Är miess noomool zer Mueter s’het e-re d‘Ketti no ussghängt

Dr Marco Streller das isch glaar, dä isch scho bitzli alt zem schutte
Bis dää mool warm isch und ka seggle bruucht das scho 60ig Minute
Und nach 70ig mag dä nimm, fir kai Gäld uff deere Wält
Do befindet sich dr Alex Frei scho lang im Suurstoffzält

80ig Minute sin verbyy, die ganzi Mannschaft isch iibroche
Dr Sommer hyylt dr Degen griächt und dr Stocker het erbrooche
Dr Staini fluecht zaigt dr Mittelfinger, ganz noch Art vom Schwoobeland
Und dr Alex sufft scho lang e Bier bim Chipperfield am Stand

Jä und bletzlig fäält ai Spiiler, dä seig aifach so abghaue
Dr Dragovic isch mool gschnäll furt, är suecht e Bundesroot zum haue
Au dr Zoua isch verschwunde, das setzt d’Mannschaaft unter Drugg
Derfir kunnt dr Murat uff em Dreiraad vo dr Muetter zrugg.

Uf dr Dribiini hoggt dr Huggel lägg dä fluecht jo gopfergässe
Will dä so Saich muess komentiere, het dä s’Mikrofoon fascht gfrässe
Nur dr Degen dänggt sich haimlig, mir sin no logger in dr Spuur
Jä so dänggt ain mit e me IQ vo dr Zimmerthämperatuur

Spiil isch verbyy, me het verloore, drotzdäm heert me unsri Stimme
Au dr Murat isch jetzt schlauer, das schaiss Dreiraad fligg y nimme
Mir leen die Ziircher jetzt mool juuble und geen drotzdäm zfriide Hai
Denn am Ändi sin mir Maischter und GC isch numme s‘Zwai


2012

Dr 100 Meter Wältrekord
Isch jetz no bim Usain Bolt
Ab näggscht Joor seet daas anderscht us
Denn het en Basel ungewollt
Im FCB syni Junioore
Sin schnäll, ass es nur so spritzt
Au ych wurd dää Rekord no bräche
Wenn d’Oeri in mi Wanne sitzt

 

Wenn d’Basler bisch denn gheert ganz sicher
Dr Karli Schwizer ab no Bäärn
Ins Bundeshuus als Nazionalroot
Deert het en d’SVP seer gäärn
Gwalifiziert isch dää ganz sicher
Dää eird deert oobe no dr Hit
Vyyl mee als ablääse und strigge
Mache die deert nämmlig nit

 

Als neije Kapitään vo de Basler
Will dr Streller jetz phersee
In unsrem Joggeli dr Raase
E bitzli heecher waggse gsee
Dr Shaquiri frait sich riisig
Fir alli Geegner wird’s jetz dinn
Denn isch das Graas no bitzli heecher
Seen en die halt aifach nimm

 

Ych bi halt absolut dr Bescht
Ych bi brutaal intelligänt
Ych waiss alles, waiss es besser
Ych bi immer omnipresänt
Mi Mainig isch die ainzig richtig
Die Andere luege nur bleed drii
No 30 Minute Ego pflääge
Isch dä Schawinski denn verbyy

 

Dr Torsten Fink dä Fuessballguru
Het vo Basel welle go
Obwool seer clever und erfolgryych
Schlussändlig het är dr Huet gno
Jetz frooge mir uns zwai nadierlig
Was miesst me dämm Maa alles gää
Fir jeede Vorschlaag sin mir danggbaar
Das sää au goot, dä – Guy Morin
In Europa herrscht e Gryyse
Das isch fir’s Image nit so doll
Nadierlig will me daas jetz ändere
Bald sin d’Staatskasse wiider voll
So-ne Veränderig bringi Voordail
Au Japan isch do voll derbyy
Si wän nit nur no “Land des Lächelns”
Nai si wän s’Land vom Straale syy

 

Im Waalkampf um dr Nazionalroot
Kämpfe d’Barteie zimmlig haart
Sogar entfiert isch aine woorde
Die Zottel-Gaiss mit schwarzem Baart
Mir hän uns gfrogt werum me Dierwält
Mit iine zieht in Bolytgrueg
Denn ains isch doch scho lang bewyyse
Gaissen und Affe gits deert gnueg

 

Dr Hakan Yakin spiilt sit neischtem
Bi Belinzona, s’isch dr Hit
Im noochhimain stimmt iin das druurig
Dr Iidealfall sigg’s doch nit
Denn fir e Matsch am Samschtigzoobe
Wo sini Mamme gäärn wurd ko
Muess die ganz sicher scho am Mittwuch
Mit iirem Dreiraad furt vo do

 

Ägypte, Lybie und dr Jemen
Dr aarabisch Frielig dä het buumt
Die Veelger hän sich aafo weere
Und hän die schlächte Sache gruumt
Jetz waarte mir scho voller Hoffnig
Und dängge, lägg wie wäär das scheen
Wenn in dr Schwyz denn näggschte Frielig
Au alli Ziircher ändlig geen

 

Wo ych Hai kumm, heer ych mi Frindin
Schreiend, steenend ganz nervees
“Mach di aaa und laad di uff
Wenn jetz nit kunnsch, denn wird ych bees”
Das macht mii aa, ych renn ins Zimmer
Splitternaggt und vellig haiss
Doch si spiilt nur mit, daas isch druurig
Däm Sproocherkennig’s I-Foon-Schaiss

 

Dr Guttenberg isch bi dr EU
Als Berooter, Internet
Jä saag emool, sin die nit ganz bagge
Noch däm was dää verbroche het
Är sell deert fir’s Rächte luege
Do stuune mir zwai nit schlächt
Als nägscht’s kunnt sicher no dä Strauss-Kahn
Und kämpft fir’s EU-Frauerächt

 

Zerscht d’Läggerli und jetz no d’Zytig
Die Stadt isch gly in Blocher Händ
Do miesst me gschnäll dergeege heebe
E rächte Maa bruucht jetz das Land
Aine git do gäärn Ruggedeggig
Aber dä Bocher dää isch schlau
Dä schiggt nur Fraue zue uns Basler
Äär kennt dr Minu ebbe au
Jetz kauft dä Blocher doch die Zytig
Fir gnapp zwai Daag, denn isch’s verbyy
Als ob das noonig gnueg wär kunnt denn
Dä TETtamanti hindedryy
Druffaabe hän mir so-ne BAZ kauft
Und als grad ghofft es sig dr Hit
Ych muess däm Blocher vellig rächt gää
Mee als zwai Daag verdraisch das nit

 

No däm dr Silvio ooni Amt isch
Het äär sich dänggt, das macht mi aa
E Rais in Vatikan das wäär’s doch
Vo deert haig är no kaini gha
Scho bi dr erschte wird är stutzig
Brüscht hän die kaini in däm Land
Dr Phapscht duet iin denn gschnäll erlyychte
Loos Digge dasch e Mineschtrand

 

Wenn’s Trudi kunnt bim “Super Thalänt”
Und singt, na ja, nit grad so doll
Sait denn d’Silvi das isch ganz nätt gsi
Nur halt sigg’s Stimmlig nit so voll
Me miess do vellicht no dra schaffe
Fir Si fäält’s aifach s’Fundamänt
Dr Bohlen isch do e gli gschnäller
Däm länggt ai Bligg – die het Thalänt

 

Dr Hildebrand dä isch zrugg drätte
Das het mi droffe wie dr Blitz
Wäär sell das Amt als näggscht’s ussfille
Wäär wurdi basse uff dä Sitz
Mir än vernoo dr Seppi Platter
Bim Argumänt do bisch verreggt
Dä wurd ganz sicher no mee bschisse
Nur waiss dä halt wie me’s versteggt

 

E Phasaschier vo deere Gryzfaart
Het gsait das Ungligg haig me blaant
Mur, ass daas wirgglig ärnscht isch
Het är am Aafang noonig gaant
Die ganzi Crew sig involviert gsi
Är wäär am liebschte wiider Hai
Denn scho bim boarde het me nämmlig
Allne gsait – heee, comme stai

 

Sit neischtem ha-n-ych a mym Fäärnsee
Au so-ne HD Gwalidäät
Gschtoche schaarf sin alli Bilder
Ych bi begaischteret vo däm Gräät
Denn ha-n-ych d’Daagesschau yygschalte
Und d’Widmer-Schlumpf het deert verzellt
Lägg mir am Arsch bi-n-ych verschrogge
Wäär het die Frau denn so entschtellt

 

Unsri Schwyzer-Fuessball-Nazi
Het fir die EM d’gwalli gspiilt