Wiggelfisch

2019

Y kum hai – mit miede Bai
mach Diir uff – do trifft mi am Hirni e Stai
No´n e Schutt in Arsch – das isch nit schwär
so iebt mi Soon fir´s Militär

Grääble, gingge, s´isch zimmlig fyys
zem Gligg gits jetz – dä Videobewyys
drhai stell y d´Kamera uff e Disch
fir dr Bewyys – ass ebbis gloffe isch

Wo´n y genau uff mi Bildschirm stiier
gseen y no dr Böschtler vom Quartiier

Ha s´Bändli no witterlaufe loo
do isch dr Mooler mit sim Binsel koo

Und drno z´Obe, wo ich hät selle
het die Zwätschge nimmi welle

E Schugger isch in e Tesla ghoggt
do het dr Tesla no´n em Passwort gfroggt
Är git´s yy – hejoderno
d´Diire geen uff und er fliegt drvo

In dr Hääfelischuel hänn mir Turne gha
und gspiilt – wär het Angscht vom Schwarze Maa
Y waiss, me ka mi wägedäm verklaage
drum duen´y dr Schwarze – lieber Ziircher saage

Es duet mr laid fir jede dunggle Maa
dass y iin – mit em e Ziircher vergliche ha

Im Groosroot git aini em Buschi d´Bruscht
jede wo´s gseet bikunnt grad – Durscht
Alli gaiffere und dängge drbyy
Jetz mecht y so gärn e – Gleesli Wyy

Dr Huushalt mache – dr Schoppe gää
bim uusegoo no – dr Kehricht mitnää
In Zunft, do muess y z´Obe au
s´fäält nimm vyyl, denn bi´n y e Frau

Wenn d ´Amherd Änglisch schwätze duet
denn lüpft´s mir verdeggel grad dr Huet
Sait sie lut – s´isch e Katastrophe
my Name isch Viola near by Oofe

wenn d´Amherd nervöös am Härd stoot
luegt sii ob am Härd au alles goot

Y bi dr Wessels Peterli, im ganze Land bikannt
bi friener s´flottischt Bürschtli gsy, jetz bi´n y en Vagant
Bi zfriide wenn y z´Nacht an Haag, mi Velo binde ka
und wenn y bis am Morge´n, e baar Parggblätz gstriche ha

Zwai fir ai Sunnecreme Guttere
so ebbis losst myni nie lo suttere
D´Aggtioone wo sii bringt – die geen mr uff d´Latte
mir woone scho zwai Joor – näbem Roche-Turm im Schatte

Sii baggere nit nur uff dr Stroos
au uff em Rhy – s´isch grandioos
An dr Herbschmäss – do hani d´Fääri gnoo
bi pinggtlig zem Morgestraich – ybere koo

D´Bachelorette Adela maint dass
Z´Basel wääle macht richtig Spass
Y iiberleg und dängg nyt schlächts
Nimm y die linggs oder nimm y die rächts…

Kompromiss ka´s kaine gää
Jetz duen´y aifach baidi nää

E roote Punggt – jo denn waisch gly
s´muess e Rabatt in dr Migros sy
Kasch e roote Punggt uff ere Stirne gsee
isch´s e neye Spiiler vom FCB

dass sii wider gwinne uff em Joggeli- Raase
leen sii hailigi Kieh druff graase

Y gump in Rhy mit em Wiggelfisch
är drait mi nit – will är lätz gwigglet isch
Y riss am e Stoff – so fescht y kaa
jesses Gott – das isch jo d´Frau Ackermaa

2018


Yych ka sit Wuche nym uff em Fuudi hogge,
d’Ärzt sin rootlos – das tuet mi schogge.
Mi Eere-Doggter het d’Leesig – sisch allerhand,
mit Topspinn knallt äär jedi Hämoryde an d’Wand!

Nach em verlääse vo Hose, Shirts und BH,
Hets no Lümpe wo Texaid – nym verwärte kaa.
Sälli göön uf Bòscht mit dr Adrässe : Merkel Angela
nit fir d’Flichtling – sii leegt se sälber aa!

S’beschte Schtügg vom Heffner – wird nie mee ùffwache
wo Gott e Düürli schliesst duet äär wo anders ains ùffmache
Jètz luueg au do an Schpanie hänggt e neye Zipfel draa
Grande Cojones, Viva Katalunia!

Verstaubti acht Joor fir d’Museums-Strategyy,
s’Roothuus kennt lengscht – e Museum sii.
Fir uns isch klar – mit Bligg vom Ryy,
sälli verschrumpfte Mumiä miese Bolytigger sii!

Y kenn e Trumpeltier das isch berootigsresischtänt,
und froogt wenn denn – nur dr russisch Bräsidänt!
Äär gryfft zem roote Delifon – hello – iisch dert ebber draa,
yych set vo eich d’Blään fir d’Berliner Muure haa!

An dr Mäss, dänggt Bolizei an s’Materielle uffrischte
mit Betonkletz kämpft me gege d’Terrorischte!
vo Atedääter bruuche mir kai Angscht me zhaa,
dr Hefner nimmt im Himmel jedi Jungfrau draa!

Es Milliönli verspräche und dert wienachtlig diniere,
Wessels nim dr 3er due im Elsass regiere.
In dr Auberge meine sie – me ka ne nit bruuche dä Gsell,
ça suffit pas zem Chef – mais pour faire la vaisselle!

D UNESCO hätt nääb dr Fasnacht – so hai mir vernoo,
fascht no e Bärner Bruuch in Eere uffgnoo.
Firs alljöörliche Ritual mit vollem Yysatz,
vo YB – fir dr eewig zwaiti Blatz!

D’Margarethe im Stich zloo isch nit pikant,
dr Grund drhinter – aber allerhand.
Dr Ländler wo nit duet – in d’Stadt inveschtiere,
wot uff kai Fall s’Dram – ins Theater verliere!

MEE TOO schryybt myyn Pizzabegg sym Dulpeliiferant,
er füült sich missbruucht – gschoggt isch s’ganze Land.
Äär het dr Hashtag verfäält – isch jetz bekannt,
nach em Quali Out – vo Italie und Holland!