Wildwäggsel

-> Doo wirdsch Fan vo de Wildwäggsel uff Facebook

2019

Syt 30 Joor gar nid dumm, git’s ooni Dings kai Bums.
Bim Syytesprung e Gummi drumm, das blyybt jetzt unter uns!
Allewil blyybt me Drey, anderscht als mer dängge.
Bim Gummi kaufe duet dr Coop, Dreye-Pynggt uns schängge!

Giggli, Reerli, Plastikgschiir, gryz und quer liigt Abfall.
Miggroplastik iiberaal, mir Lääbe im ne Saustall!
Alles fliegt zem Auto us, nadyyrlig ooni Sorge.
Nur d’Fraue vo däm Bätscheler, diens in d’Bryscht entsorge!

E schwyzer Hornkue flichted, diräggt noch Afrika.
Zwische Laien und Giraffe, grast’s mit me Impala!
E Nashorn frogt ob bi iire, e Wilderer isch koo?
Nei, s’schwyzer Stimmvolgg het mer jetz, aifach d’Hörner gno!

Probiert uns dr Schneider Ammann, emol ebbis z verzelle,
Verstöön kai Wort vo all dämm, was er het sage welle!
Jetzt redet är uf s’mol ganz glaar, isch wach und s’goot em guet.
Verstoosch en e mol ändlig, do nimmt er glatt dr Huet!

E Foti am Bach mit Minschter, derzue no mini Frau au.
Hinde spieglet dr Baloiseturm, im Ranze wirds mer au flau!
Bim retouschiere am Compi, wird ich dene langsam muff.
Werum isch au uf däm Bild, mi Frau no immer druff!

Noch Dubai goot dr Ribèry, isst mit em Fuessballsold.
Saignant, gwiirzt mit wenig Salz, ummantlets Steak mit Gold!
E Shit-Storm und e riiseBuess, han ich jezt au bekoo.
Mi Frau het mi Znyyni in, Silberbapyyrli doo!

Die änglisch Queen isch not amused, Brexit is not okay.
Glii haissts Goodbye EU! In UK herrscht May-Day!
So goot sii in dr Gschicht yy, sii isch so ainzigartig.
Dr Cameron wirkt dangg dr May, als Looser no grossartig!

Em Baschi isch’s schnurzegal, kauft die Tesla fascht legal.
Dä Skandal isch so banal, z Basel isch’s efangs normal!
Die Schugger-Kader Hipster sind, glai Mediegail und „in“.
Jetz, fählt s’Tamara Wernli no, als Mediesprächerin!

Die letscht Fusion isch Bach ab, jetz hän d’Städter klemmt.
S’Rammel-Spital het kai Gäld, zviil Höhefüür hän brennt!
Dr Lauber schiggt dr Weber, so het me uns verzellt.
Zum, Schwiizer Radio will deert au, jede Rappe zellt!

In Klote hogge d’Pilote, im Fluugi gnäärvt am Gate.
Mäldisch bisch bereit zem Start, haisst’s immer nur please Wait!
Noch paar Stunde duet do, e Captain duure starte.
Mir kenne dä ganz guet verstoo, wär wott in Ziiri waarte!

Die Summerhitz lot bi gwiisne, dr Schädel lo ufhaitze.
Negro oder Moorekopf, setsch jetz nimmi haisse!
Bisch Politisch nit koräggt, gseet sofort aine root.
D’Vernunft stirbt vor de Gletscher, dr Klima-Hitze-Tod!

Noch hundert-fimfe-zwanzig Joor, fyyrt dr Ef ce Bee.
Für’s Jubiläum hän si drum, e Nobel Dinner gee!
S’Fraueteam verkauft nur Löösli, amted als Lotofee.
Mir, hätte doch viil lieber do, dr Streller in Strapse gsee!

Langväärs:

Dr Groossroot hietet d Buschis vo, dääre Stadt.
doch hen si jetzt das Blabbere, schnäll scho satt!
Si hän im Root dr Buschi-boogie-, woogie-blues.
Das isch guguus: (Baby-gag)

Me sait das hit doch Buschis gar, politisch sind
Dr Groossroot weiss nit me als, männgges Kind.
Em Wessels steert das d’S V P dr, Gnopf nimm findt!
Er macht en Grind: (Baby-gag)

Dr Baschi maint Regiere isch kai, Ponyhoof.
und d’Ackermaa findet alli, Ponys Doof!
Dr Galacchi nach em Gaggi fascht, duuregheit.
Und er schreit: (Baby-gag)

S Buschi vo der Lea schloofft im, Groose Root
Der Kähli iires pfuust in Bäärn und, het nie Toobt.
D’Froog isch do wie’s uf Befääl grad, schlooffe ka?
Dangg Pharmaka?

2017


Dr Roger fäggt de Spanisch Bueb, grad in fimf Sätz ewägg.
Trotz halbem Joor lang Pause, do glinggt em das Comebägg!
Mir hoffe nur, dass Politik, kai Byspiill draa duet nee:
Denn das Fuudi vo däm Wäber, wämmer nimme gsee.

Im erschte-Zug mit Vollgas, duur unsri Gotthardreere,
Duet d’Merkel Angie eppis, – ganz entsetzlig steere.
Sii sait zem Leythard Doorli, so ganz vo Wyyb zu Wyybli:
„I glaub di Glaid seet wirgligg us, wie s Schwyzer Nati-Lyybli!“

Verfallsch em Lottofieber, suechsch au bim Shiva Root.
Die richtige 6 Nummere, e Rettig us dr Noot.
Doch d Suechi nach de Zaale, wird aifach – zwyyfelsfrai:
Dangg Schwiiz am Sunntig hesch se – am Samschtig scho dehai!

Dr Trump schnuurt in Amerika, nur alles Schutt und Gröll.
Dä Typ das sage mir voruss, kunnt speeter mol in d Höll.
Im Grund gno luegsch en aifach aa, denn waisch yyber dä Dropf:
Das Stroo wo uff dr Biire isch….. het er au im Kopf!

Poschtfiliale mache zue, drum gits jetzt als Ersatz
D Metzggerei, und Apithek, au sAlterhaim als Platz
Dr Poschtverkehr isch denne dört und das us guetem Grund
So weisch genau, wenn de draa schmeggsch, wohär das Päckli kunnt.

In Ängland hän si ohni Witz, zem Keschte abefaare.
E neyi Toblerone brocht, sduet Kalorie spaare.
Mit zwei-drei Gipfel weniger, mir findes exelänt
Het die genau so Zacke ab, wie dr Ami-Bresidänt.

Die hytig Jugend isch nimm guet, das sait dr Pisa Tescht.
Nur mit em Handy vor em Gsicht, wirsch sicher nie dr Bescht.
Do muess me sich nit wundere, wenn d’Noote abesagge.
Sie bruche jetz sogar es App, zem s Pausebrot uspagge!

D Schwiegermamme hoggt mit mir, bi Bier und EM-Dress.
Vor dr Kischte duet si soo, als wär sie Gilbert Gress.
Sie brielt ´Offside´, kennt d Reegle nid, do hani miesse loose:
„Dr Jogi het“, sie isch entsetzt: „E Händs gmacht in de Hoose!“

Bim näggschte Match scho wiider, do foot dä Gryysel aa
Ribbt sich unter de Aggsle und schmeggt am Finger draa.
Bii de Glugger schalt ich um, uff SF1, scho bedursches;
Do maint dr Wätterschmegger: „Chli stinggä muess es!“

S‘neye Team fir Basel-Stadt, sind Exibitionischte!
Faare mit däm Baywatch-Stiil, e ganz e frächi Kischte.
Wie bleedi Änte ufem Stääg, so kunnts uns iiber d Lippe:
Baschi Dürr mit Hienerbruscht, het dängg scho Vogelgrippe.

Die neye Drohne bi dr Poscht, das duet uns sehr entsetze
Die sölle schins in nägster Zyt, dr Pöstler ganz ersetze.
Jetzt hän mir richtig Angscht dervoor, hän scho vyll Alpträum gha
Fir uns haissts denn ab sofort – im Bett muesch wieder draa.

Duesch e weeneli bschisse und Styyre hinterzie?
Dringgsch mänggmol iibere Durscht? An Regle haltsch di nie?
Faarsch gärn e digge Schlitte, liebsch Fifty Schaids of Grey?
Wird doch aifach ain vo uns. – Yyri Basler Bolizey!

2016

Bim Blatter Sepp wird bschisse, und Schwarzgäld ume gschoobe,
fyr Zää Milliönli kauft dr Franz, d WM bi de Schwoobe!
Mir wüsste jetzt e FiFa Chef, es isch e weeni bitter,
dr Uli Hoeness muess es si, dä hoggt no hinter Gitter!

Bluti Brischt und Liebeskugele, sogar e Lesbeschau,
d Extasia bringt d extase, deert aane mien mir au!
Das BaZ Urteil isch Mässerscharf, Glasklar ligt s uf dr Hand,
In dr Stadt gits kai Verkeer, Stosszyt gits uf em Land!

D SVP het miesse wie, dr Gargamel druff blange,
noch langer Zyt isch ändlig, s Widmer-Schlümpfli gange.
Mit em rächte Parmelin, sait ganz fräch s Leuthard Doorli,
ab jetz hänn mir kai Schlümpfli me, derfyyr e wälsche Knoorli!

Wetsch in d‘Stadt go läädele, Sii, das isch langsam schwäär,
dr Koscht, Deiss und Botty, die Lääde sin jetz läär.
Us lääre Lääde kennt me, aber dient nit lache,
grandios scheeni Unterkynft, fyr Asylante mache!

De hust hust hust hust hust hust, hust hust hust hust hust hust hust,
hust hust hust hust hust hust hust, hust hust hust hust hust hust hust.
Hust hust hust hust hust hust hust, hust hust hust hust hust hust hust,
hust hust hust hust hust hust hust, hust hust hust hust Volkswage!

Wenn Hollywood do ane kunnt, an unseri Kunscht-Wält,
wird an dr Art yykauft, me het e huffe Gäld!
D BaZ zaigt Miro fiidleblutt, wie sii im Drämmli faart,
die Kunscht versteen mir alli nit, uns gfallt nur iiri Art!

Donald Trump in USA, schwätzt mee als är dänggt,
scho männgmool hänn der Blocher, und Brunner Toni zwänggt.
Doo die zwei jetz nimmi sind, das wäär doch kolossaal,
wäär als neie Bresidänt, dä Trumpel nur genial!

Dr Wessels mit sim Velowaan, findet das sau glatt,
vo däm Zwänggrind hän mer gnueg, er zerschteert die ganzi Stadt!
Als näggschte Furz will dää, mir kennes kuum verdaue,
us der Fluughaafepischte, e Veloparking baue!

Sit Fimfefufzig Jöörli heisst‘s, „Trittst im Morgenrot daher“,
mir sueche e neii Hymne, dr Thäggscht isch vyyl zue schweer!
Das kenne mir nit singe, do wärde mir ganz Ranzig,
hätte mir nur d Kompedänz, vom Leerplan 21ig!

Längväärs

So dr Morin Guy isch gange, d Hiener gaggere uff dr Stange,
und dr Stall isch jetzte leer, sii vermisse dää so seer.
Jo er goot in Ruhestand, mit im au no dr letscht Verstand
und so zieht dä grieni Maa, si Doggter-Kittel wiider a!

Der erscht Patient heisst Wäber, s Hirni fliggsch mit Heisslimkläber,
und Pegida gits als Sprützi, wo bim Dürr als Hoorwux nützi.
Dr Guy sait zem Wessels Stöphel, nimm vom Sirup grad zwei Löffel,
dä git Graft und Rue, und glääbt dir d Schnuure zue!

Loos Guy kunsch uf Heimvisite, denn ruum ich dr Drägg uf d Syte,
zie mi Neglischee denn a, Dangg Viagra luschtig ha.
Sait dr Guy dr Ackermaa, Frau Grossroot si sin hit nit dra,
Eymaa bruuch die Pille au, d Herzog isch doch e Frau!

Ritalin griegt dr Rutschmann Edi, will dää macht jo nur komedi,
und im André Auderset, verschryybt er glai Rue im Bett.
Dr Brutschin isch Partei-demänt Aengelbärg Inkonsischtänt,
het dr Frehner Hämoriide, muess bi jedem Arschtritt Lyyde

So dr Morin Guy isch gange, wiesoo losst dä uns so hange,
denn sii Büro isch jetzt leer, ooni in wird s bänggle schweer.
Daas isch doch Biirewaich, ooni Guy isch das e Saich,
är fäält uns wirgglig feschd, will er wär dr Bescht!