Wenn die Sonne auf den Schneemann trifft, ist der «Schmelzpunkt» schnell erreicht. Mit Blick auf die Ereignisse des vergangenen Jahres lässt sich sagen: Leider schmilzt nicht alles so stilvoll sie ein Schneemann. Dr «Schmelzpunggt» ist im 2025 das erste Jahr unterwegs.
Väärs 2025
An de Fachgräft manglets oobe wie au unde
woby fir oobe het me maischtens no eine gfunde
E Sunne und e Schneemaa nimmsch als Schnitzelbangg zur Noot
Numme in dr Mitti findsch kain fir in Bundesroot
In dr Migros bim poschte bi de Bio Riebli
Und au no bi de Sunnegrääme fir glaini Biebli
Finde mir zwai Artiggel – aber sicher kaini acht
Fir die dr Roger Federer no kai Wäärbig macht
Bi de US-Waale stuune mir wie daas ka goo
Dass e Sexstrofdäter d Stimme vo de Grischte tuet bikoo
D’ Antwort isch eifach, logisch und e bitz au unerheert
Aber sottig Däter hen doch in dr Kiirche no nie gsteert
Mir hen welle do in Basel go die Baustelle zelle
und hen e glaini Duur bhlaant zu deene viile Stelle
Fascht wäre mir zur Quelle vo de Baustelle koo
Numme bi dr erschte Baustell het me uns nid duureloo
Unser Schwyzer Mylidäär stoot under Duurbeschuss
Will alles, was si kauffe, das isch eifach nur Stuss
Drum empfääle mir Droone, Bhanzer und au Suppekelle
soll d Armee in China bi Temu bschtelle
D Autobaan Abstimmig macht em Röschti Maagebrenne
E Löösig fir d Fynanzierig wurde mir schoo kenne
In s Landwirtschaftsbudget wurde mir das integriere
und d’Iberhoolspur fir Traggdore reservieres
Wo is d BVB iiber s Dramnetz 2030 informiert
Isch uns glaar 2030 wird das Brojäggt erscht brojeggdiert
das macht Sinn, e will Dram wo 2030 am Barfi sott stoo
wird deert wägere Demo erscht 2040 akoo
Dr Bonus vonere 13. AHV het uns schogghiert
Wär soll daas zaale, daas gheert korrigiert
Sottig Boni tien mir sunscht fir Topmanager reserviere
Wo s au schaffe e gaanzi Grossbangg z ruiniere
Dr Genderstäärn hen d Ziircher welle per Gsetz eliminiere
D’ Hyschteryy lot yss kalt, do mien mir nid interveniere
Schneemaa mit Stäärn und -frau mit Doppelpunggt au das goot
Numme sait mir eine Böög; dä schloon i doot